Хрватите направиле истражување „Како крадеме?“

Типичниот хрватски измамник е маж, околу 50 години стар и има долг стаж во организацијата што е жртва на измамата. Во повеќе од две третини од случаите престапникот има и соучесници.

„Како крадеме“ е првото сеопфатно истражување спроведено од Здружението на овластени истражители на измами во Хрватска, локален огранок на Меѓународната асоцијација на овластени истражители на измами (ACFE). Истражувањето е за видовите и начините на измами во хрватското економско опкружување  и опфатило повеќе од 3.500 испитаници, при што во детали испитува 124 случаи на измами во 16 различни економски сектори во последниве две години, пренесува Пословни дневник. Вкупната забележана штета е поголема од 22 милиони евра, а се проценува дека 13% од вкупните приходи во економијата се загубени поради измами во работењето.

Типичниот хрватски измамник е маж, околу 50 години стар и има долг стаж во организацијата што е жртва на измамата. Во повеќе од две третини од случаите престапникот има и соучесници. Просечната загуба по оштетена организација е околу 100 илјади евра, а типичната измама трае осум месеци пред да биде откриена. Противправното присвојување на средства е најчест облик на измама (52% од случаите), потоа мито и корупција (31%), додека трет и брзо растечки облик на измама е компјутерски/кибер криминал (22%). Три четвртини од измамите опфатени во истражувањето се направени во приватниот сектор, додека остатокот отпаѓа на државен и јавен сектор.

Само 22% од измамите се откриени со дојава или поплака, а во споредба со меѓународните искуства, Хрватите се потпросечни во менаџерските контролни механизми. Дури 13% од сите измами се откриени случајно, половина од организациите не поседуваат контролни механизми за откривање измами, а само 7% од организациите во моментот на измамата имале СОС телефон или друг формален механизам на пријавување.