Цементарница УСЈЕ со поголеми приходи и помала добивка во првите девет месеци

Компанијата има поголеми приходи од продажба за 10%, но и пораснати расходи за 20%, при што нето добивката изнесува 17 милиони евра и е пониска за 7% во однос на лани.

Скопската цементарница УСЈЕ во првите девет месеци годинава има поголеми приходи од продажба за 10%, и тие изнесуваат 3,87 милијарди денари (околу 63 милиони евра), при што приходите на домашниот пазар изнесуваат 2,48 милијарди денари (40,5 милиони евра) и бележат раст од 3%, додека извозот на УСЈЕ пораснал за 26% на 1,39 милијарди денари (22,5 милиони евра).

Според билансот на успех на УСЈЕ доставен до Македонска берза, расходите на компанијата во првите девет месеци изнесуваат 2,85 милијарди денари  и се пораснати за 20% во однос на истиот период лани, при што набавната вредност на трговските стоки е повисока за 19%, а на трошоците за суровини и други материјали за 27%.

Од позначајните ставки на расходната страна, пораст има и кај услугите со карактер на материјални трошоци, за 21%.

Оперативната добивка на УСЈЕ е 1,18 милијарди денари (19,2 милиони евра) и е за 7% пониска во однос на лани. Финансиските приходи (од вложувања, заеми и камати и курсни разлики) се повисоки за 7%, додека финансиските расходи се повисоки за 76%.

Нето добивката на Цементарница УСЈЕ за првите девет месеци изнесува 1,054 милијарди денари (17,14 милиони евра) и е за 7% пониска во однос на лани.