Човештвото „нурна“ во вселената 13 милијарди години назад во времето

Деновиве беше објавена првата слика во боја направена од вселенскиот телескоп „Џејмс Веб“ и навистина е фасцинантна. Научниците објавија дека тоа е најдлабокиот, најдетален инфрацрвен приказ на вселената досега, којшто содржи светлина од галаксии на којашто ѝ требале многу милијарди години за да стигне до Земјата.

Фотографијата што е пред вас почитувани читатели, прикажува неверојатна снимка на длабоката вселена која оди наназад во времето повеќе од 13 милијарди години. Некои од овие далечни галаксии и ѕвездени јата никогаш претходно не се видени.
„Џејмс Веб“ е телескоп вреден 10 милијарди долари и може да „нурне“  во атмосферата на егзопланетите и да набљудува некои од најстарите галаксии во вселената користејќи систем на леќи, филтри и призми за откривање на сигнали во инфрацрвениот спектар, којшто е невидлив за човечкото око. Развојот на овој телескоп почна уште кон средината на 1990-те и конечно беше лансиран во вселената во декември, 2021. Тој е најмоќен телескоп испратен во вселената досега, практично наследник на фамозниот „Хабл“.