120 дена

Овој број на Капитал излегува на 24 јуни, точно четири месеци откако Русија ја нападна Украина, на 24 февруари, после упорно убедување на светот  дека нема да го стори тоа и дека претходните стравувања околу нејзината инвазија биле измислица и пропаганда на Западот. Според некои извештаи на меѓународните организации, во овие изминати 120 дена војната во Украина предизвика преку 4.000 цивилни жртви, иако точната бројка тешко може да се утврди и веројатно е многу поголема. За неброените жртви меѓу војниците и на двете страни, подобро и да не спомнуваме. Оваа безумна војна предизвика и масовни уништувања на инфраструктурата, станбени и деловни објекти во Украина, што ќе ја врати економијата на земјата со години, ако не и децении назад во времето. Последиците пак, по светскиот мир, безбедност и економија, ги чувствуваме сите секојдневно – цените на храната, енергенсите и многу други производи вртоглаво растат од ден на ден. Овие две дечиња на фотографијата, снимени во украинскиот град Бородјанка како се лулаат во паркчето спроти разрушена од гранатирање зграда, веројатно е една од ретките сцени на „нормалност“ што може да се види во земјата во моментов, своевидна надеж дека радоста на животот ќе го победи на крајот злото на уништувањето.