86% од директорите низ цел свет очекуваат рецесија во следните 12 месеци

Повеќе од половина од анкетираните бизнис лидери или 58% сметаат дека рецесијата ќе биде „блага и кратка“, вели истражувањето на KPMG.

Околу 86% од анкетираните извршни директори низ цел свет очекуваат рецесија во нивниот регион во следните 12 месеци, покажува новото истражување на глобалната консултантска компанија  KPMG. Повеќе од половина од анкетираните бизнис лидери или 58% сметаат дека рецесијата ќе биде „блага и кратка“.

Сепак, повеќето од 1.300 извршни директори анкетирани од KPMG меѓу јули и август рекле дека на нивните бизниси би можело да им биде тешко да закрепнат  од пандемијата доколку има повеќе нарушувања, како што е рецесијата.

Малку надеж дава фактот што извршните директори биле нешто пооптимистични отколку на почетокот на годината и рекле дека очекуваат раст во следните три години.

KPMG  соопшти дека извршните директори ширум светот се исто така загрижени околу исцрпеноста на компаниите од  пандемијата, покрај рецесијата и ефектите од зголемувањето на каматните стапки врз економијата.

Покрај непосредните проблеми како рецесија, бизнис лидерите велат дека сè уште се под притисок да ги исполнат своите пошироки социјални одговорности бидејќи јавноста внимателно ги разгледува нивните корпоративни цели и одговорностите за животната средина, социјалните аспекти и управувањето (ESG).

Со тоа што економијата се уште е во лоша состојба, сепак постојат знаци дека трендот “Great Resignation”, масовното заминување на вработените во САД и западна Европа,  би можел да забавува. На пример, 39% од извршните директори веќе ги замрзнале новите вработувања, а 46% размислуваат за отпуштање работници во следните 6 месеци. Но, изгледите за следните три години се попозитивни, само 9 отсто очекуваат дополнителен пад на бројот на вработени.

Извршните директори сè уште даваат висок приоритет на дигиталната трансформација, иако во моментов има многу неизвесност. Сепак, 40% од бизнисите ги ставиле своите планови за дигитална трансформација на стендбај, а уште 37% планираат да го сторат истото во следните 6 месеци.

Во период од три години, повеќе од една четвртина од испитаниците мислат дека унапредувањето на дигитализацијата и деловното поврзување е исто така важно за исполнување на целите за раст. Седумдесет и четири проценти исто така се согласуваат дека стратешките инвестиции на нивната компанија во дигитализација  и ESG се нераскинливо поврзани.