Граѓанската платформа Ајде за денеска во 17.30 часот најави нов протест пред Уставниот суд на кој ќе се ирази револтот од вчерашната одлука на Уставниот суд, со која на претседателот на државата му се дозволува да може да помилува осуденици за изборен криминал и луѓе на кои им се суди за изборни криминали.

Граѓаните прифаќањето на таквата иницијатива го сметаат за срамен чин, а Уставниот суд го окарактеризираа како соучесник во изборна криминализација.
“Со ова, ВМРО-ДПМНЕ уште еднаш покажа дека за нив правниот систем е само алатка која им служи за заштита од правдата, а не за нејзино спроведување. Ние граѓаните нема да дозволиме крадците на нашите животи, преку партиски узурпираниот Уставен суд да си ги спасат своите злосторничко-криминални „кожи“ од издржување на заслужените затворски казни. Нема да дозволиме повторно да си поигруваат со државните институции како да се нивен личен имот или партиски огранок. Во Македонија мора да се врати правдата, почитувањето на законите и пред сѐ, почитувањето на Уставот”, велат од “Ајде”.

На вчерашниот протест граѓаните им покажаа црвени картони на уставните судии што гласаа „за“ прифаќање на оваа иницијатива, извикуваа „нема правда, нема мир“, а дел од нив фрлаа и јајца кон зградата на судот. Беа истакнати и испечатени и имињата на петте судии кои ја одобрија промената на Законот за помилување. Насобраниот народ побара оставки од уставните судии од Елена Гошева, Никола Ивановски, Владимир Стојаноски, Вангелина Миркудова, Јован Јосифовски, кои се изјаснија “за” оваа иницијатива која ескпресно беше одобрена од Уставниот суд.