Finance Think: Речиси половина од економските ветувања на Владата се остваруваат спротивно од ветеното

„Причините за оваа состојба вклучуваат нереалистично поставување на таргетите имајќи ги предвид претходните остварувања, нереалистично поставување имајќи предвид дека економијата е во криза предизвикана од пандемијата, како и поставување таргети кои може да го нарушат пазарот или кои може да блокираат неразумно голем контингент буџетски средства за ветувањето да се реализира. “, велат од Finance Think.

Само 18% од ветувањата во економската програма на Владата (2020-2024) или пет од вкупно 27 се исполнети досега, покажува извештајот на Finance Think, со наслов „Големи економски ветувања, големи потфрлувања?“, објавен денеска.

Речиси половина или 44% од 27-те економски ветувања на изборите во јули 2020 година се остваруваат во спротивна насока од ветената, покажува анализата, 14,8% се во насока на исполнување, 7,4% се неисполнети, а за 14,8% се’ уште нема податок.

„На прв поглед, бројката на исполнети економски ветувања не е висока, но мора да се има предвид дека поголем дел од ветувањата/целите се однесуваат на 2024 година, па порелевантни се резултатите во групите ‘во насока на остварување’ и ‘спротивно од насоката на остварување’“, се вели во извештајот.

Во групата исполнети ветувања главно се ветувањата за т.н. оперативни таргети во даночната сфера, односно намалувањето на стапката на ДДВ за ресторански услуги на 10%, на занаетчиски услуги на 5%, подигнувањето на регистрацискиот праг за ДДВ на 3 милиони денари, и незголемувањето на стапката на данокот на добивка.

Четири ветувања, или 14.8%, се во насока на исполнување. Тие вклучуваат: одржлив и инклузивен раст од 4%, обем на СДИ до вкупен износ од 1 милијарда евра до 2024, зголемување на извозот до 8 милијарди евра во 2024, пораст на просечната плата за 20-30% до 2024.

Политичките ветувања од економско-социјалниот домен преточени во Програмата за работа на Владата 2020- 2024 година се остваруваат со различна динамика, но вкупниот заклучок е дека остварувањето е недоволно за да може да се каже дека тие се исполнуваат, се вели на крајот од извештајот на Finance Think. Скоро половина  од дадените ветувања во економско – социјалниот домен, моментално се остваруваат во насока спротивна од даденото ветување.

„Причините за оваа состојба вклучуваат нереалистично поставување на таргетите имајќи ги предвид претходните остварувања, нереалистично поставување имајќи предвид дека економијата е во криза предизвикана од пандемијата, како и поставување таргети кои може да го нарушат пазарот или кои може да блокираат неразумно голем контингент буџетски средства за ветувањето да се реализира. “, велат од Finance Think.

Оттука, Finance Think препорачува поставувањето на целите во програмите на политичките партии и, следствено, на Владата да биде реалистично и да води сметка за изводливоста и чинењето. Порамнувањето на политичките ветувања во економскиот домен со фундаментите на економијата, тековната фаза на развојот, како и со менталитетот на граѓаните и компаниите, ќе придонесе за подобри и поефективни економски политики.