Од алатки за дигитален маркетинг до софтвери за авијација – македонските стартапи развиваат продукти за светски пазар, им треба поддршка да го освојат
Објавено на од во COVER STORY

Glavna coШто се случува на домашната стартап сцена

Разговаравме со четворица македонски “стартапџии“ од ИКТ сферата, од различни генерации, со различни искуства и развивачи на различни технолошки решенија, но со иста цел: да го лансираат сопствениот продукт на светскиот пазар, за што им треба финансиска инјекција којашто секој ја бара како што знае и умее.

Во светот, според некои процени, има околу 1,5 милиони пилоти во цивилното воздухопловство, и токму тие, или барем 10% од нив се целната група на еден македонски стартап, Synapse Aviation. Основан од Филип Арсов, пред три години, како спин – оф на неговата постара компанија Synapse Group, стартапот разви софтверски продукт што им ја олеснува работата на пилотите, поточно, им овозможува да го запознаат подобро секој аеродром кон кој што летаат, односно треба да слетаат. Продуктот се вика Airport Briefing, и е алатка што им помага на пилотите да развијат т.н. situational awareness, односно перцепција за локацијата, теренот, климатските услови, и сите останати факториклучни за нивното запознавање со еден аеродром, било каде во светот, што на крајот треба да им овозможи безбедно слетување, полетување и движење на самиот аеродром.

“Преку Airport Briefing, пилотите ја зајакнуваат својата способност да идентификуваат потенцијални опасности и пречки при слетувањето, односно преку тренинг со апликацијата да ги елиминираат во што поголема мера изненадувањата што може да се случат при летање кон одреден аеродром кој што е помалку или воопшто познат “, ја објаснува Филип платформата.
Продуктот на Synapse Aviation е дел од она што го прават, за жал с$ уште релативно мал број од македонските стартапи изминативе години, главно од ИТ сферата се разбира, како финални софтверско – технолошки продукти наменети за светскиот пазар. Овој пат разговарав со четворица основачи на вакви стартапи, коишто се во крајна фаза на развој на своите продукти или веќе ги имаат лансирано, и тие ги споделија нивните искуства и предизвици. Заеднички именител на сите четири стартап приказни е дека најголемиот предизвик за нивните основачи/менаџери не е самиот развој на продуктот, туку фазата на комерцијализација и пробивање на светскиот пазар, за што на крајот се потребни всушност и најголемите пари.

07coСлушај паталец, не гаталец!

Идејата на Филип Арсов и неговиот тим да развиваат продукт за една специфична целна група на корисници, пилоти во случајов, потекнува всушност токму од еден таков професионалец, неговиот пријател и бизнис партнер Кочо Мојсов, којшто работи како пилот во една голема блискоисточна авиокомпанија. И самиот соочен со секојдневните предизвици при извршувањето на летачките операции, односно потребата од постоење на некаква алатка што би им помагала на пилотите да “го научат“ добро секој нов аеродром кон којшто летаат, му спомнал во една прилика на Филип и тој по кусо време развил со своите колеги првична демо верзија на алатка што користи 3D визуелизација и го прави тоа што Кочо го барал. Откако и двајцата сфатиле дека апликацијата може да се доразвие во сосема функционален и многу корисен продукт за сите пилоти, решиле проектот да се развива во рамки на посебна компанија, во којашто со свој сопственички удел влегол и Мојсов, но и уште четворица негови колеги – пилоти од истата компанија, со помали удели.

“Всушност од маките што си ги имале Кочо и неговите колеги во работата, произлезе целиот овој проект. И како што рекол мудриот народ ‘слушај паталец, а не гаталец’, ние во Synapse Aviation ги послушавме нивните совети и сугестии и направивме софтвер што досега недостасуваше во процесот на подготовка на пилотите за летање кон непознати за нив аеродроми. Но, со оглед дека пилотите во комерцијалната авијација, особено во големите авиокомпании менуваат десетици дестинации годишно, никогаш не штети да си го обноват познавањето на одреден аеродром, иако слетувале и претходно на него, но поминало подолго време од последниот пат.“, вели Филип Арсов.

Тој појаснува дека Airport Briefing не е “flight simulator” какви што постојат за обука на идните пилоти, ниту навигациски софтвер, за чијшто развој и употреба меѓународната авијатичка регулатива пропишува посебни стандарди и сертификати, туку дополнување на постоечките алатки за фамилијаризација на пилотите со нивните крајни дестинации.

“Светските асоцијации што ја тангираат проблематиката на цивилната авијација, ICAO и ЕASA, во своите препораки велат дека лична одговорност на секој пилот, е покрај официјалните алатки, да се подготвува за лет и со сите дополнителни решенија што се на располагање. Проблемот со тие официјални алатки, е што тоа се обично водичи и упатства од стотици страници, при што пилотите се преплавени со море на информации, сув текст, без многу графика. Ние им даваме графички приказ во 3D визуелизација, што досега го немаше во овој тип на алатки, што може да работи и офлајн, на сето тоа што ги чека при слетување (а, најголемиот дел авионски несреќи се случуваат при полетување и слетување), да знаат што ги чека, да се зголеми нивната ‘ситуациска свесност’, што ќе води до подобро расудување и донесување брзи одлуки и зголемена безбедност на самиот лет.“, објаснува Арсов.

Првиот голем клиент

Екипата на Synapse Aviation го претстави Airport Briefing на ИТ саем за авијација во Амстердам, продуктот побуди интерес во фелата и стартапот веќе има еден голем клиент, германско – турската авиокомпанија Sun Express, заеднички бизнис на Lufthansa и Turkish Airlines. Периодов се врши имплементација на компаниски содржини во софтверот и од октомври 550 пилоти на превозникот ќе почнат да ја користат апликацијата.

“Апликацијата ја продаваме и на App Store на Apple, развиваме верзија и за Android и Windows, a досега имаме преку 3.000 индивидуални корисници, претплатници што ја симнале апликацијата. Учествуваме на саеми, имаме целосна маркетинг кампања, со социјални медиуми, со инфлуенсери, со с$ што се дигитални алатки. Нашата идеја ја преточивме во производ, имаме валидација од пазарот, и сега ни треба капитал за да го комерцијализираме посилно и да го подобриме. Сега, кога е изложен на јавноста, добива фидбек од илјадници пилоти, постојано добиваме идеи и сугестии како да го подобриме. Допрва сега почнува реализацијата на целата идеја, и нам капиталот ни е потребен за да го забрзаме целиот процес. Времето е клучен фактор, нештата во технолошката сфера се менуваат секој ден, не можеме да чекаме 5 или 10 години, да заработиме нешто, па да реинвестираме и сл. Нам ни треба свежа финансиска инјекција, веднаш, за да го зголемиме тимот, да имаме повеќе ресурси за истражување и развој, техничка поддршка, продажба, да одиме на повеќе саеми, итн,“, вели нашиот соговорник.

Голема улога во пробивањето на Airport Briefing на светскиот пазар може да имаат и организациите што ги споменавме, ICAO и ЕАSA, коишто се одговорни и за безбедносните регулативи и стандарди во комерцијалната авијација и нивно унапредување, и коишто по тестирањето на софтверот можат да дадат забелешка “одобрено“, “препорачано“ и сл., што ја зголемува многукратно брзината на освојување на пазарот, односно бројот на корпоративни и индивидуални корисници на апликацијата.

“Токму и за овие работи, кај што треба лобирање, вмрежување, контакти, итн., нам ни треба исто така свеж капитал. Ги разгледуваме сите можни опции, и тоа што го нуди државата преку својот инвестициски фонд, и бизнис ангели, и странски венчр фондови, сите варијанти се во оптек“, вели Арсов.

08co1Предлог: заеднички настап на ИКТ компаниите на странски пазари

Што се однесува до предизвикот за продажбата на продуктите на светски пазар, Љупчо Вангелски, основач и менаџер на софтверската компанија VapourApps има еден практичен предлог. Тој смета дека отворање заедничко продажно претставништво на повеќе компании во некоја голема европска или светска метропола би можело да помогне.

“Да се здружиме 15 – 20 компании, секоја да даде по 500-1000 евра месечно, на пример, и да отвориме канцеларија во Берлин или Лондон. Така може и човек тамошен да се ангажира за продажба, со квалитетна мрежа на контакти, да му се даде плата и да се стимулира дополнително со процент од реализација. Тоа би имало логика доколку стартапите имаат различни производи, да не си конкурираме меѓу себе, што главно е и така, бидејќи реално ретко се наоѓаат во Македонија два стартапи од ИКТ сфера што имаат ист производ.“, вели Вангелски.

Но, според него, тука има друг проблем што може да се јави.

“Сум видел ситуации кога стартапи контактираат со странски потенцијални клиенти и им велат, знаете, ние го нудиме овој продукт, но нудиме и вакви услуги, онакви услуги, аутсорс и сл. Многу стартапи што креираат сопствени решенија работат и аутсорс услуги со цел да преживеат и да може да го финансираат развојот на продуктот, но при евентуален здружен настап на странски пазар, мора да се фокусираме само на продуктите, инаку ќе се разводни целата идеја“, смета Вангелски.

09coVapourApps и проблемите со ИТ администрацијата ќе “испарат“

Тој додава дека и неговата компанија работи аутсорс, но дека настојува барем 70% од приходите да му доаѓаат од продажба на продуктот, а тоа е платформа за менаџирање на ИТ апликациите што ги користат бизнисите, во (cloud), на сервери и сл.

Примарен таргет им се мали и средни компании, коишто во секојдневното работење имаат потреба од основни ИТ апликации – за водење на вработените, менаџирање документи, мејлови, заштита, итн. За сите овие потреби компаниите обично купуваат физички сервери, закупуваат виртуелни сервери во телеком операторите, во Amazon, Google и сл. или пак прават комбинација од сите овие опции.

“Управувањето со сите овие апликации, како и со трошоците за нивното користење, може да претставува сериозен проблем за компанија која најчесто и нема специјален ИТ администратор што ќе се грижи за сето ова. А, и да го има, неговата работа многу се компликува, односно колку што фирмата навлегува с$ повеќе во користењето на различни cloud решенија и апликации, тој ќе има повеќе системи за администрирање. Ние нудиме софтверска платформа што ќе им го олесни или реши овој проблем, односно еден интерфејс, панел, преку којшто на едно место, во реално време, пристапуваат до различните апликации и ги гледаат трошоците што ги имаат за закупените сервери кај различни провајдери, а дел од апликациите им ги даваме ние како готови, развиени на Linux платформа, што значи ги ослободуваме нашите клиенти од плаќањето на скапи лиценци за Microsoft и останатите светски софтверски гиганти. Така можеме на нашите клиенти да им заштедиме десетици илјади евра годишно, трошоци и за закуп на лиценци, но и за одржување на системите, за коишто многу често и не се свесни до крај каде с$ им одат. “ објаснува Вангелски.

Постојано во потрага по нова инвестиција

Вангелски и тимот од VapоurApps ја развиваат оваа платформа последниве три години, за што добија и поддршка од 30.000 евра од Фондот за иновации и технолошки развој, коишто ги искористиле за доразвивање на апликацијата. Но, Љупчо вели дека стартапот е во потрага и по нова инвестиција за да може да растат побрзо и со продажбата, а тоа може да го направат, само со пласман на надворешни пазари. За таа цел им се потребни пари за маркетинг, за учество на саеми, за барање партнери, продавачи, итн.

“Ако не растеме брзо, односно ако не скалираме, како што се вели во стартап жаргонот, ќе се појави некој помоќен конкурент од надвор и ќе не ‘згази’ со својот продукт, со квалитет, со цена, со с$. Нам ни е потребно да најдеме партнерски фирми во Германија и останатите големи пазари на Европа и пошироко, каде што има многу голем број на мали и средни компании, потенцијални наши клиенти и каде што можеме одеднаш, што се вели, да дојдеме до 500 или 1000 од нив. Тоа не можеме да го правиме од тука, барем јас не гледам начин како да го изведам тоа, а да не се преселам и физички во странство.“, вели нашиот соговорник.

Вангелски додава дека периодов е растрчан токму во потрага по нова инвестиција, за што ќе аплицираат како стартап и на следниот повик на Фондот за иновации, но разгледуваат и други опции.

“Мора да бидеме присутни на сите побитни настани на тема стартапи и претприемништво, каде што доаѓаат луѓе коишто може да ви посредуваат во наоѓање инвестиција од бизнис ангели, фондови, итн., за што си наплаќаат соодветна провизија. Акцелераторските програми се исто така многу битни, особено во Лондон, Берлин и другите светски центри познати по развиениот стартап екосистем. Акцелераторите не само што ви помагаат со менторство, туку ви ставаат на располагање цела мрежа на контакти со инвеститори.“

08coЧленството во акцелератор им отвори можност за работа со Carrefour и L’Oreal

Еден од македонските стартапи што ја користи предноста на членство во некој од европските бизнис акцелератори е EmbedSocial, компанија основана од Никола Бојков, и неговите партнери Дени, Ивана, Јане и Кате во 2015 година. Креатори се на алатка за дигитален маркетинг којашто им помага на компаниии брендови да ја зголемат довербата кај своите клиенти и продажбата како крајна цел, преку кориснички генерирани содржини – фотографии, видеа, рецензии како и најновиот формат на “Stories”.

“Од почетокот на годинава сме членки на стартап еко системот и акцелератор The Family од Париз, којшто има свои претставништва и во Лондон и Берлин. Ние за акцелераторот дознавме на еден друг стартап настан токму во Берлин кон крајот на минатата година, ни кажаа дека имаат отворен повик, дека не дискриминираат стартапи врз основа на тоа дали се од Балкан, ЕУ и сл., нѐпоканија да аплицираме и ете, од први јануари годинава сме нивни членки. The Family ни помогна многу со менторство, совети и ни ги отворија видиците. Не извадија од една комфор зона во која се наоѓавме во поглед на тоа како сакаме да ја развиваме компанијата и нѐнатераа да размислуваме многу посмело“, вели Бојков.
Бидејќи The Family имаат широка мрежа на контакти со големи брендови, тоа на EmbedSocial им дало шанса да разговараат за проекти со гиганти како Carrefour, L’Oreal и други, до коишто не би можеле да дојдат без силни препораки. Бојков им препорачува на сите македонски стартапи со амбиција за пробивање на светскиот пазар, да не аплицираат во сите познати европски акцелератори, туку да го идентификуваат вистинскиот акцелератор за нивниот стартап и да се фокусираат да влезат во нивната програма затоа што членството носи големи бенефити.

“Многу е тешко да ја градиш мрежата на контакти и потенцијални клиенти тука од Македонија, затоа постојат тие акцелератори што покрај скапоцениот коучинг, ти отвораат и многу врати и ја зголемуваат шансата за наоѓање на инвеститор. Ние сме сега во фаза на раст, имаме постигнато т.н. market fit ниво, и влегуваме во т.н. скалирање, бидејќи растеме со 20% месечно. Во моментов сме профитабилни, тоа е многу битен момент, но евентуална инвестиција би искористиле за отворање канцеларии во САД, Франција и Германија, каде што би барале корпоративни клиенти. Идентификувавме неколку венчр капитал фондови со коишто би можеле да соработуваме, и кон крајот на годинава планираме да почнеме преговори со нив“, објаснува Бојков.

Премин од сервисна во продукт ориентирана фирма

А, што всушност добиваат клиентите на EmbedSocial: на пример, клиентот е продажен синџир за потрошувачка електроника. EmbedSocial може да ги земе сите рецензии во врска со работата на овој трговец, од сите социјални мрежи, и да му даде на клиентот онлајн платформа кај што ќе може да ги генерира и менаџира овие содржини, и со еден код да ги додаде на сопствената веб страна. Кога потрошувачот ќе дојде на веб страната да може да ги прочита сите рецензии за конкретен производ, но и да види фотографии собрани од Instagram, Facebook и сл. од задоволни корисници во акција, коишто ги покажуваат како доказ. Клиентот има пристап до софтверот наEmbedSocial, тука се прави сѐ, но крајниот корисник го гледа тоа на официјалната веб страна.

“Ние во принцип имаме три групи на клиенти: мали и средни компании, коишто самите го користат нашиот софтвер; маркетинг и дигитални агенции што го прават тоа во име на клиентот и третата група се корпоративн клиенти, големи фирми. Платформата ја лансиравме во 2016 година, ја лансиравме на светски пазар, и сега преку 99% од клиентите ни се надвор од Македонија“.
Бојков и неговите партнери и самите имале дигитална маркетинг агенција пред да ја основаат EmbedSocial, со која почнале уште во 2009 година, и работеле проектно, со своите клиенти, чиј број постојано растел. Во 2012 година станале и официјален Facebook маркетинг партнер, соработувале со многу маркетинг агенции и брендови, но сфатиле дека во сервисната индустрија за секој нов проект им требаат нови ресурси и не можат да опслужат голем број клиенти во исто време.

“Мислевме дека ќе биде полесен тој премин од сервисна во продукт ориентирана индустрија, но излезе поголем предизвик одошто очекувавме. Најголема тешкотија ни беше да најдеме луѓе што го изоделе тој пат, што може да ни бидат ментори, па дури и да им понудиме удел во нашата компанија, и да ни помогнат побрзо да ја развиваме. Зборувавме со многу претприемачи, и не најдовме платформа што е business – to – business и која пораснала до ниво од неколку десетици или стотици илјади корисници. Затоа почнавме да бараме помош надвор од земјава и така всушност дојде и соработката со The Family“, раскажува Бојков за искуството со својот нов стартап.

10coПрограмерите да не работат за некого, туку со некого

Никола вели дека домашната стартап сцена, споредено со периодот кога ја почнувал својата прва бизнис приказна пред десетина години е прилично напредната.

“Сега има поголеми можности за финансирање, повеќе капитал, а тогаш немаше ништо. Единствена опција беше да работиш аутсорс, да почнеш веднаш да заработуваш и потоа дел од тоа да инвестираш во развој на некаков продукт. Но, бидејќи доста време се изгуби во аутсорсингот, сега имаме премалку продукт ориентирани стартапи. А, само квантитетот на стартапи, може да роди квалитет, значи ни требаат многу повеќе продуктно ориентирани стартапи.

Кај нас најголем дел од програмерите го трошат својот талент во аутсорсинг проектите, каде што нема голема додадена вредност, нема креација.
Ние во EmbedSocial сакаме да кажеме дека програмерите не треба да работат за некого, туку со некого.

На Македонија ѝ фали една успешна приказна, стартап што ќе биде купен за милионски износи евра од поголем играч, и неговите основачи ќе излезат како финансиски независни, и потоа ќе бараат нови прилики, дали во сопствен нов стартап или ќе влезат со удели во некој друг, не е битно. Само на тој начин кога ќе имате високо квалитетни професионалци кои веќе го имаат потребното искуство и ќе бидат мотивирани од мисијата на стартапот, а не големината на платата, ќе може да очекуваме брз развој на стартап сцената во Македонија.“

Глигор Дачевски е наш стар познаник, еден од најискусните претприемачи во ИТ бизнисот во Македонија. Еден од пионерите кои учествуваа во трасирањето на патот на првите ИТ компании во Македонија за подоцна и самостојно да продолжи со своите визии за развој на софтверски продукти. Во меѓувреме Дачевски имаше неколку проекти, од кои некои забележаа и светски успех, како на пример, мобилната апликација за фитнес, SportyPal, а во последниве 2-3 години со стартапот DoxTeam, е фокусиран кон развој на софтверското решение Microtica коешто всушност треба да ја олесни работата на негови колеги програмери низ цел свет.

Познат како долгогодишен голем борец за препознавање на Македонија како дестинација со квалитетни ИТ професионалци што можат да изработат решенија конкурентни за на светски пазар, и самиот со неговата компанија DoxTeam има испорачано софтверски решенија за неколку клиенти надвор од земјава, меѓу кои и швајцарскиот гигант од секторот реосигурување (името не може да го спомнеме заради клаузулата во договорот што го имаат со нив, но кој малку го познава светскиот финансиски пазар, ќе знае), како и Недерман, шведски производител на индустриски системи за прочистување воздух, лидер во својата област во светот, за кого што тимот на Дачевски изработи платформа базирана на Internet of things – IoT, која што преку сензори и останати модули на производителот му овозможува контрола на функционирањето на неговите системи инсталирани кај бројните клиенти од цел свет.

“Во Македонија потенцијал има, но битно е како се користи. Доколку се фокусирате на аутсорсинг услуги, така и ќе ве препознаваат во светот. Како што е и во индустријата за храна, туризмот и сл., така и во ИТ секторот, како држава треба да се има стратегија, дали сакате да се брендирате како ИТ дестинација или не. Во овој глобализиран свет на крајот на денот и не е битно од каде сте ако имате добар продукт, но како што реков веќе, токму маркетирањето и продажбата на светски пазар е веројатно најтешкиот дел од целиот процес на развој на продуктот. Но, доколку земјата преку неколку примери изгради имиџ на квалитетна дестинација за развој на софтверски решенија, понатаму ќе биде полесно за сите други технолошки стартапи да ги пробиваат своите продукти глобално.“

Завршно полирање на продуктот

Што се однесува до најновиот продукт од лабораторијата за иновации на Дачевски, Microtica, тоа е платформа што овозможува дигитализација и трансформација на бизнисите со помош на т.н. микросервиси кои што се развиваат во облак (cloud). Ова е business-to-business алатка, за компании што се занимаваат со софтверски решенија, а не за крајни корисници во смисла на потрошувачи или брендови, како што ни објасни Дачевски.
Микросервисите како термин се користат во поново време во светот на софтверските инженери, додава нашиот соговорник, поинтензивно во последниве 5-6 години, така што проблематиката е малку покомпликувана за “непрограмери“, па затоа ќе се обидам да го “преведам“ наједноставно за нас лаиците тоа што го слушнав од Дачевки: решението DoxTeam им помага на програмерските куќи многу побрзо да постават инфраструктура за креирање софтверски апликацииво cloud, односно им заштедува многу време.

“Досега, требаше да конфигурирате десетици алатки само за да поставите околина што ќе креира и искористува микросервиси. Со Microtica сето ова го постигнувате со еден чекор.“, вели Дачевски.

Во моментов тимовите на DoxTeam ја користат Microtica интерно за проектите што ги водат за четири нивни поголеми клиенти, но како што вели Дачевски, на продуктот му треба уште неколку месеци завршна доработка, да се отстранат “баговите“ што ќе ги забележат првите корисници, односно програмерите во самата компанија и нивните соработници од партнерските фирми, пред да се пушти во официјална продажба.

“Сега имаме ‘неполиран’ продукт, да го светнеме малку и спакуваме убаво, што се вели, пред да одиме со пробивање на светскиот пазар“.

А, бидејќи секое маркетирање на продуктот и глобална продажба бара значителни вложувања, понекогаш и поголеми од самиот развој на софтверот, како што ни објасни Дачевски, DoxTeam за таа намена ќе ги искористи парите што ги доби од државниот Фонд за иновации и технолошки развој.

“Алициравме на повикот на Фондот и добивме грант од околу 19 милиони денари, средства што ни се потребни за завршните фази на развојот на Microtica и нејзино лансирање на глобален пазар. Во светот на софтверот, како и во многу други индустрии, може да имаш перфектен продукт, но најтешка е продажбата. Меѓу другото, ќе ги искористиме парите за засилување токму на овој сегмент во нашата компанија, веројатно ќе отвориме и наша канцеларија во некој од светски значајните бизнис центри, кај што се присутни големите играчи во овој бизнис“, вели Дачевски.

Голем англиски фудбалски клуб ќе биде корисник на Microtica

Дачевски ни откри и дека меѓу идните клиенти кои ќе ја користат Microtica многу веројатно ќе биде и славен англиски премиерлигаш, поточно софтверските тимови што ги развиваат неговите дигитални платформи. Во моментов не можеше да ни го открие неговото име, затоа што договорот уште не е официјализиран, но Microtica ќе им помогне на тамошните ИТ стручњаци да креираат поефективни дигитални платформи за комуникација со фановите и целата јавност.

“Тие се задоволни од тоа што досега им го претставивме, како технолошко решение поминавме кај нивните експерти за дигитализација. Microtica го има одговорот т.е она што ќе им помогне нивните дигитални платформи (веб портали, профили на социјални мрежи, онлајн продавници, итн.) да ги доведат до ниво на поефективна комуникација со навивачите во цел свет, што на крајот треба да донесе поголема заработка за клубот, се разбира. Microtica ќе им го овозможи токму тоа што им беше потребно, односно ќе им заштеди многу време и материјални ресурси на самите програмерски тимови што работат за овој клуб – институција во креирање на тие платформи“, вели Дачевски.

Напишете коментар

Вашата адреса за е-пошта нема да биде објавена. Задолжителните полиња се означени со *

Вие можете да ги користите следните HTML ознаки: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

коментари и анализи
...Сите ние живееме во време, кога само идејата е капитал, сè друго е пари...
Најава
Регистрација

На вашата e-mail адреса ќе добиете лозинка за логирање на КАПИТАЛ.

Заборавена лозинка?

Внесете e-mail адреса или корисничко име со кое сте регистрирани на КАПИТАЛ.

×