Интервјуто беше реализирано во Прага, на маргините на меѓународна средба на Longines, во соработка со Божиновски часовници & накит, долгогодишен партнер и официјален претставник на брендот на нашиот пазар. Преку оваа соработка, филозофијата на Longines – елеганција, прецизност и пристапен луксуз континуирано се развива и комуницира во регионот.
Во разговорот, Патрик Аун, CEO на Longines, зборува за лидерство, иновации, регионални пазари и за променливата дефиниција на луксузот, нудејќи јасен увид во тоа како еден глобален бренд го балансира наследството со современата релевантност и зошто локалните партнерства се клучни за долгорочен раст.Интервју реализирано во Прага, во рамки на официјален настан на Longines, во соработка со Божиновски часовници & накит, долгогодишен партнер и официјален претставник на брендот на нашиот пазар.
Љубица Ангелковска за Капитал
Капитал: На средбата во Прага имавте исклучително инспиративен говор. Зборувавте за односите и за страста како краен доказ за успех и за тоа што значи да го водиш времето, без да му дозволиш времето да те води тебе. Како овие вредности се преточуваат во вашиот секојдневен начин на водење на Longines?
Патрик Аун: За мене, сè почнува од луѓето. Ние сме во бизнис што создава емоционална врска, а таква врска не може да се изгради без автентичност, страст и долгорочна визија. Односите секогаш доаѓаат пред бизнисот.
Во Longines, ова значи да останеме блиску до пазарите, до партнерите и до клиентите. Да слушаме не само бројки, туку и очекувања, вредности и навики. Тоа е единствениот начин да се гради бренд што трае.
Страста, од друга страна, не е лична особина, туку професионален компас. Таа нè води да размислуваме долгорочно, да не реагираме импулсивно на трендови, туку да носиме одлуки што ќе имаат смисла и по 20, 30 или 50 години. За мене, токму тоа значи да го водиш времето — а не да му дозволиш тоа да те води тебе.
Капитал: Longines има повеќе од 190 години часовничарска историја. Како брендот го балансира занаетчиското наследство со современата иновација?
Патрик Аун: Иновацијата отсекогаш била дел од ДНК-то на Longines — не за да следиме трендови, туку за да останеме верни на она што ги прави нашите часовници посебни. Низ годините воведовме dual-time модели, flyback хронографи и high-frequency механизми. Денес, фокусот е на напредни материјали како силиконски спирали и антимагнетни компоненти, со цел да ја зголемиме доверливоста, издржливоста и прецизноста.
Гледајќи напред, клучот е во спојот на безвременската елеганција и внимателната иновација. Нашата цел е да создаваме часовници што се визуелно убави, но и функционално прилагодени на реалните потреби на денешниот носител. Со внимателно слушање на клиентите и разбирање на еволуцијата на вкусот, можеме да продолжиме да креираме парчиња што се и класични и современи. За Longines, иновацијата секогаш значи траен квалитет и реална вредност.
Капитал: Преку партнери како Божиновски часовници & накит, Longines континуирано го гради своето присуство на нашиот пазар. Како ја оценувате улогата на локалните партнерства и потенцијалот на Југоисточна Европа?
Патрик Аун: Пазарите во Југоисточна Европа претставуваат значаен потенцијал за идниот раст. За Longines, секој пазар е важен. Нашиот фокус е на квалитативна дистрибуција што нè доближува до локалните потрошувачи, без разлика дали преку mono-brand бутици или внимателно избрани multi-brand формати.
Силните локални партнерства се суштински, затоа што ни овозможуваат директна поврзаност со клиентите, подобро разбирање на нивните очекувања и автентична испорака на бренд-искуството.
Капитал: Денешниот клиент е помлад, подобро информиран и очекува транспарентност. Како Longines одговара на оваа промена?
Патрик Аун: Помладите клиенти бараат значење и релевантност, а не само лого. Со речиси 200 години историја, Longines има безброј приказни за споделување. Ние го оживуваме тоа наследство преку часовници што се елегантни, безвременски и усогласени со современиот начин на живот.
Транспарентноста, автентичноста и вредноста се клучни. Останувајќи верни на сопствениот идентитет, природно воспоставуваме врска со новата генерација што ја цени суштината и кредибилитетот.
Капитал: Longines е глобален бренд, но културата на луксуз се разликува од пазар до пазар. Колку е важна локализацијата?
Патрик Аун: Работејќи со тимови во различни региони, видов колку културните разлики влијаат врз тоа што луѓето го вреднуваат кај еден часовник. Истовремено, постојат вредности што се универзални, како што се елеганцијата, доверливоста и занаетчискиот квалитет.
Со слушање на локалните тимови и разбирање на преференциите на клиентите, можеме да направиме суптилни прилагодувања, на пример преку прилагодени бренд-искуства. Токму овој баланс помеѓу глобална визија и локален увид ни овозможува да останеме верни на наследството и идентитетот низ различни култури.
Капитал: Дали дефиницијата за луксуз се менува во 21 век и каде се позиционира Longines денес?
Патрик Аун: Индустријата брзо се развива, но побарувачката за автентичност никогаш не била посилна. Longines е одлично позициониран благодарение на швајцарскиот квалитет, елегантниот дизајн и иновациите по пристапна цена. Токму овие предности го водат нашиот раст и ни овозможуваат да останеме доследни на сопствениот идентитет.
Капитал: Многу брендови се стремат да станат „lifestyle“ брендови. Што го прави Longines дел од личниот идентитет, а не само стилски избор?
Патрик Аун: Longines претставува наследство на занаетчиска извонредност и автентичност. Речиси два века брендот ги спојува техничката прецизност и безвременската елеганција, создавајќи часовници што не се само модни додатоци, туку трајни симболи на идентитет. Секој часовник носи филозофија на смислен дизајн и перформанс, поврзувајќи го носителот со традиција на истражување и прецизност. Затоа Longines станува дел од личната приказна — не преку трендови, туку преку вредности што го издржуваат тестот на времето.
Капитал: Многу лидери зборуваат за стратегија и бројки. Вие зборувате за односи, страст и вредности. Зошто верувате дека токму овие „немерливи“ елементи се клучни за долгорочниот успех на еден глобален бренд како Longines?
Патрик Аун: Затоа што бројките секогаш се резултат, никогаш почетна точка. Долгорочниот успех доаѓа кога брендот има јасен идентитет и кога е доследен на своите вредности.
Во Longines, ние градиме врски засновани на доверба со клиентите, со партнерите и со локалните тимови. Тие односи ни овозможуваат да останеме релевантни и автентични, без разлика на пазарот или културниот контекст.
Страста и вредностите се она што му дава смисла на сè друго. Тие ни помагаат да создаваме часовници што не се само убави или технички напредни, туку и значајни за луѓето што ги носат. Во индустрија каде што трендовите брзо се менуваат, токму овие „немерливи“ елементи се она што обезбедува стабилност, кредибилитет и трајна вредност.
