Photomath со својата апликација за учење математика го привлече вниманието на технолошкиот гигант

Photomath е најпопуларната хрватска мобилна апликација со речиси 300 милиони преземања, а особено е успешна на американскиот пазар, што веројатно најмногу го разбуди интересот на гигант како Google.

Американскиот Google  е во процес на преземање на хрватската компанија Photomath, која развива истоимена апликација за решавање математички задачи.

Сега под капата на Google, односно чадор-компанијата Alphabet, третата по големина технолошка компанија во светот по пазарна капитализација (по Apple и Microsoft), доаѓа хрватска компанија – Photomath. Официјално, трансакцијата ќе се гледа како купување на американска компанија, бидејќи седиштето на Photomath, компанијата која ја развива истоимената апликација за решавање математички проблеми, е во САД, но основачот на компанијата, познатиот сериски стартап претприемач Дамир Сабол е од Хрватска, каде што се одвива најголемиот дел од развојот и вработува најголем број луѓе.

Како што објави Ројтерс, антимонополските регулаторни органи на Европската унија одредиле датум за донесување одлука за купување на Photomath од Google. На 28 март европскиот регулатор ќе одлучи дали Alphabet, матичната компанија на Google, може да ја преземе хрватската компанија.

Информацијата се наведува во поднесокот на Европската комисија, кој беше објавен деновиве. Во моментов се чека дали телото  на Европската унија задолжено за конкурентност на пазарот, ќе го одобри договорот по прелиминарниот преглед. Може да се случи и да отвори четиримесечна истрага доколку тврди дека има неправилности.

“Можеме да потврдиме дека склучивме договор за купување на Photomath во мај 2022 година, што е предмет на регулаторна проверка“, изјави портпаролот на Google за Ројтерс.

Најпопуларна хрватска апликација

Дамир Сабол, основач и извршен директор на Photomath, ја потврди веста за преземањето ексклузивно за хрватскиот портал Лидер. Точно е дека потпишаа договор со Google за преземање на Photomath.

„Да, потпишавме договор за преземање, под услов на одобрение од регулаторните тела на Европската унија, кој е во тек и се уште не е завршен“,  накратко изјави Сабол.

Сепак, тој засега не можеше да коментира повеќе од тоа, токму затоа што договорот во моментов е предмет на одобрување од регулаторните органи.

Од Google велат  дека технологијата на Photomath ќе им помогне да им обезбедат  на своите корисници подобро искуство во учењето математика и во градењето на понудата на Google за решавање на домашните задачи за младите корисници.

Photomath е најпопуларната хрватска мобилна апликација со речиси 300 милиони преземања, а особено е успешна на американскиот пазар, што веројатно најмногу го разбуди интересот на гигант како Google. Инаку, апликацијата на Photomath користи камера на паметен телефон или научен калкулатор за да ги идентификува и објасни математичките проблеми. Компанијата оствари приход од 5,8 милиони евра во 2021 година, а досега фондовите за ризичен капитал или venture funds, Menlo Ventures, LearnCapital, Goodwater Capital, GSV Ventures и Cherubic имаат инвестирано во Photomath.

Инвестирани се вкупно 29 милиони долари, од кои последната инвестиција од 23 милиони долари под водство на Menlo Ventures е реализирана пред две години.

Самата апликација беше објавена во 2014 година од загрепската компанија Microblink, исто така во сопственост на Сабол. Од 2017 година, Photomath работи како посебна компанија.

Износот на аквизицијата сè уште не е познат, но ова би можело да биде една од најголемите аквизиции на некоја хрватска  компанија досега.

Добра вест за стартап сцената на целиот регион

Јуре Микуж, менаџер на VC фондот South Central Ventures и веројатно најискусниот инвеститор во стартапи во регионот како што пишува Лидер медиа, вели дека „ова е одлична приказна за Дамир и неговиот тим, а исто така и за целиот стартап екосистем во Хрватска“.

„Тоа покажува дека е можно да се развијат решенија на овој простор кои можат да бидат интересни за најголемите играчи во светот и за кои тие се подготвени да платат високи суми за да дојдат до нив без сопствен, органски развој. Не ги знам деталите за трансакцијата, но претпоставувам дека имаат договор и околу тоа колку тимот на Photomath отсега ќе биде вклучен во развојот на други решенија во Google“, вели Микуж.

И Жељко Периќ, искусен експерт за спојувања и аквизиции и сопственик на консултантската компанија Caper, истакнува дека Дамир Собол веќе докажал дека е исклучителен претприемач и одличен иноватор.

„ Photomath е извонреден деловен потфат, па не сум многу изненаден што се најде на радарот на компанија како Google. Хрватската стартап сцена е квалитетна и ова е само дополнителна потврда и верувам силен поттик за сите етаблирани играчи, но и оптимисти сонувачи да веруваат во себе“,  истакнува Периќ.

Фактот дека Photomath е со седиште во САД секако ја олесни оваа трансакција, како и претходните инвестициски рунди.

„Седиштето во САД решава неколку ризици кои баш и ваквите купци и не ги сакаат, па тоа секако помогна во брзината на нивната одлука. Но, мислам дека појавата на Photomath на разни конференции и други настани низ светот имаше многу поголемо влијание врз инвестицијата отколку само седиштето во САД“,  смета Микуж.

И Периќ пак вели дека седиштето во САД не било одлучувачко, но секако помогнало да се намали перцепцијата за „егзотичност“ и негативните стереотипи, што понекогаш ги одвраќа американските инвеститори да инвестираат во компании од балканскиот регион.

„Исто така, фактот што Photomath е регистрирана во САД секако, од перспектива на купувачот и неговите советници, ја олесни правната процедура и креирањето на договорна документација, која често може да биде доста напорна при прекуграничните трансакции“, вели Периќ.

„Шопингот“ на Google

Дека е така говори и фактот што повеќето од компаниите што во последно време ги презеде Google, односно Alphabet се со седиште во САД, а потоа следи Израел.

А на кои компании под капата на Gloogle треба да им се придружи Photomath, ако се оди добро со регулаторните одобренија?

Една од најзначајните (и понови) аквизиции што ги направи Google е купувањето на Mandiant за 5,4 милијарди долари во февруари 2022 година. Mandiant е добро позната компанија која се занимава со кибербезбедност, а со купувањето на оваа компанија, Google продолжи да ги развива своите технологии и услуги во оваа област.

Аквизиција која вреди да се спомене е купувањето на компанијата Nest за 3,2 милијарди долари во јануари 2014. Nest е компанија која се занимава со технологија за паметни домови, а Google со оваа аквизиција го прошири својот бизнис во секторот.

Третата најголема аквизиција беше купувањето на DoubleClick од Google за 3,1 милијарди долари во април 2007 година. DoubleClick беше еден од најголемите системи за онлајн рекламирање во тоа време, а со оваа аквизиција Google стана доминантен играч во областа на онлајн рекламирањето.

Google го купи и Waze во 2005 година за 1,3 милијарди долари, YouTube за 1,6 милијарди долари, Fitbit во 2007 година за 2,10 милијарди долари и Looker во 2011 година за 2,60 милијарди долари.

Од сите аквизиции, 18 беа во секторот за кибербезбедност, 13 во секторот на социјални медиуми и 12 во секторот AdTech. Google продолжува да прави аквизиции, а некои од најновите аквизиции се MobiledgeX и Raxium.

MobiledgeX, компанија која се занимава со технологиите на т.н. edge computing, беше купена во април 2022 година. Оваа аквизиција му овозможи на Google пристап до напредни технологии кои користат компјутерски ресурси на работ на мрежата, подобрувајќи ја брзината и ефикасноста во обработката на податоците.

Raxium, компанија за безбедност на податоци, беше купена во март 2022 година. Оваа аквизиција придонесе за понатамошен развој на технологиите за кибербезбедност на Google, кои ги штитат податоците на корисниците и го подобруваат квалитетот на услугите. Сите овие аквизиции покажуваат дека Google продолжува активно да инвестира во развојот на нови технологии и услуги, а во исто време го зајакнува својот бизнис.